Vaqt ki ungli pakday rehnaa achhaa lagtaa hai

Vaqt ki ungli pakday rehnaa achhaa lagtaa hai 

Ham ko chaltay-phirtay rehnaa achhaa lagtaa hai 

Ek samandar, laakhon dariya, dil mein ik toofaan 

Shaam-o-sahar yoon miltay rehnaa achhaa lagtaa hai 

Kitni raaten sotay sotay guzreen khwaabon mein 

Lekin ab to jagtay  rehnaa achhaa lagtaa hai 

Sach kay darvaazay par dastak detaa rehtaa hoon 

Aag kee lapten odhay rehnaa achhaa lagtaa hai 

Phoolon kay khilnay ka mausam door talak lekin 

Gunchaa gunchaa simtay rehnaa achhaa lagtaa hai 

Lamhaa-lamhaa pal-pal mainay tum say baaten keen 

Paas tumharay baithay rehnaa achhaa lagtaa hai 

Sooraj odhaa, taaray odhay, odhay din aur raat 

Ham ko jaltay-bujhtay rehnaa achhaa lagtaa hai 

Tanhaayi mein baith kay pehron tum say baaten keen 

Ham ko ghazlen padhtay rehnaa achhaa lagtaa hai 

Kitnay saaray chehray badlay lekin ab 'Khullar'

Ek saleeqaa odhay rehnaa achhaa lagtaa hai 

                    Writer: Vishal Khullar