Ye zameen tum ho Aasmaan ho tum
Har taraf tum ho par kahaan ho tum
Ye jahaan hai - jahaan jahaan ho tum
Kya kahen kis qadar nihaan ho tum
koyi be-lafz baat keh jaao
Log kehtay hain be-zubaan ho tum
Jaisay gardish mein hai lahoo ta-umr
Yahin par ho magar ravaan ho tum
Koyi kehtaa hai tum yaqeenan ho
Koyi kehtaa hai ik gumaan ho tum
Ham kahaan hain hamen nahin maaloom
Jahaan dhoondha vahaan vahaan ho tum
‘Kaash’ vo bhee fasaana ho mumkin
Ham kahen kuchh bhi to bayaan ho tum
~ Priyal Maheshwari 'kaash' ~
No comments:
Post a Comment