Two Shayars -Two Ghazals - One idea - Kahaan Jaatay?

                                    1.

Tumhaari anjuman say uth kay deewaanay kahaan jaatay
Jo vaabstaa huye tum say vo afsaanay kahaan jaatay

Nikal kar dair-o-kaaba say agar miltaa na maikhaanaa
To thukraaye huye banday Khuda jaanay kahaan jaatay

Tumhaari be-rukhi nay laaj rakh lee baada-khaanay ki
Tum aankhon say pilaa detay to paimaanay kahaan jaatay

Chalo achchaa huaa kaam aa gayi deewaangi apni
Vagarnaa ham zamaanay bhar ko samjhaanay kahaan jaatay

'Qateel' apnaa muqaddar gham say begaanaa agar hotaa
To phir apnay paraaye ham say pehchaanay kahaan jaatay

                                " Qateel Shifaaii "

========================================

                                          2.

Na miltaa gham to barbaadi kay afsaanay kahaan jaatay  

Agar duniyaa chaman hoti to veeraanay kahaan jaatay  

Chalo achchhaa huaa apnon meñ koyi ghair to niklaa
Agar hotay sabhi apnay to begaanay kahaan jaatay  

Duaayen do mohabbat ham nay mit kay tum ko sikhlaayi
Na jalti shamma mehfil me to parvaanay kahaan jaatay  

Tumhin  nay gham ki daulat dee badaa ehsaan farmaaya 
Zamaanay bhar kay aagay haath phailaanay kahaan jaatay  

                                                 " Shakeel Badayuni "

Anjuman   =      Mehfil, Gathering

Vaabstaa   =     Linked, Connected

Dair-o-Kaaba  = Temples and Mosques (Religious places)

Baada-khaanaa  =   Bar, Pub

Paimaanay         =  Glasses, cups for serving wines

Begaanaa          = Unknown, unaffected, untouched 

Begaanay         =  Strangers