Hazaar Naam thay meray magar main Ek tha

Safar hayaat ka tamaam - hijraton mein bant gaya
Vatan zameen hee rahee main sarhdon mein bant gaya

Hazaar naam thay meray magar main sirf ek tha
Na jaanay kab main mandiron mein masjidon mein bant gaya

Safar kay aakhri qadam pay ye khula, ki ghar mera
Bacha liya tha rahzanon say - rahbaron mein bant gaya

Khyaal tu hai, khwaab tu - sawaal tu,  jawaab tu
Main teri khoj mein nikal kay raaston mein bant gaya

Main lakht lakht aadmi kay dukh sametataa rahaa
Khuda jo masjidon mein tha namaaziyon mein bant gaya

                                                       " Farhat Shehzad "

Hayaat              = Life

Hijrton mein    =  Migrations, Changing place of residence

Rahzan              = Pirate, Thief, Robber

Rahbar              = Guide

Lakht-lakht      = Piece by piece