Ye Saal Nayaa Achhaa Rahay

                      Ye Saal Nayaa Achhaa Rahay

Maazoor ho na gareeb ho - Na koyi kisi ka raqeeb ho

Har marz ka tabeeb ho - Sukh chain sab ko naseeb ho

Miten dooriyaan - qareeb hon - Na gair - Sab habeeb hon

Shaaeestaa hon -  adeeb hon - Sab log khush-naseeb hon

Ab kisi ko koyi gham na ho - Ab aankh koyi nam na ho

Koyi  dil  kisi  ka  na  today - koyi saath kisi ka na chhoday

Koyi chaahay jis bhi haal mein ho - Larzish na uski chaal mein ho

Sabr-o-Sidaq khisaal mein ho - Har baat Sur aur Taal mein ho

Har lafz ho napaa tulaa - Na dil mein ho koyi gilaa

Sab maangen har ik ka bhalaa - Dil aasmaan saa ho khulaa

Na dil ho koyi malaal mein - Na haath uthen swaal mein

Na ho koyi zawaal mein - Har shakhs ho khush haal mein

Na hizra ho  visaal mein - Har chehra ho jalaal mein

Hai kisi kay jo khyaal mein - Usay sab milay is Saal mein

Ye Saal nayaa ab aisaa ho - Na dangay hon na jhagdaa ho

Har dil mein pyaar ka jazbaa ho - Ki jo bhi ho sab achhaa ho 

Lab pay bas yahi dua rahay - Har Dil mein yahi sadaa rahay

Sab pay Prabhu kripa rahay - Ye Saal Nayaa Achhaa Rahay

Maalik ka aasraa rahay - Aur dil mein hauslaa rahay

Naa 'Rajan' faaslaa rahay - Ye Saal Nayaa Achhaa Rahay

Lab pay ye hee dua rahay - Ye Saal Nayaa Achhaa Rahay

Sab par Prabhu kripa rahay - Ye Saal Nayaa Achhaa Rahay

                      '  Rajan Sachdeva '

Maazoor       =     Helpless, Feeble, Vulnerable

Raqeeb          =    Enemy

Tabeeb          =    Doctor, One who can cure, Therapist

Habeeb         =     Friends, Well-wishers

Shaaeestaa   =    Cultured, Courteous, Refined, Sophisticated

Adeeb            =    Wise, Intelligent, Civilized, Artistic

Larzish          =    Shivering, Trembling with fear

Khisaal          =    Nature, Habit

Malaal           =    Sorrow, Regret, Grief

Sawaal          =     Asking, Begging  

Zawaal           =   Downfall, Decline

Hijra              =   Separation,

Visaal            =   Union

Jalaal            =   Glory, Dignity