Meri to zindagi hai faqat Aap hi kay saath

Koi kisi kay saath hai - koi kisi kay saath
Meri to zindagi hai faqat Aap hi kay saath 

Reham-o-karam say jholi meri bhar dee aap nay
Dekha hai jab bhi mainay tumhen bebasi kay saath 

Shayad ghamon me doob kay reh jaati zindagi 
Rehmat na teri hoti agar zindagi kay saath

Meri mushkilen hameshaa door kee hain aap naay
Mujhko nawaaza aap nay har ik khushi kay saath

Man me ho dhyaan tera, nazron me tu hi tu
Nisbat meri ho sirf teri zaat hi kay saath

Talkhi na ho zubaan me, lehjaa bhi naram ho

Pesh aaun har kisi say hi main aajizee kay saath

 'Rajan' ki iltejaa hai  - ae meray Saahiba
Baaki jo zindagi hai katay bandagi kay saath
                              'Rajan Sachdeva'