Ye Kaun Hai ?

Murajhaaye se chehare par 
         kuchh aadee, kuchh tirachheen 
                     kuchh halkee, kuchh gaharee 
Syaah see lakeeren 
        khichadee jaise baal 
                      haal se behaal 
Thaka haara tan 
                    udaas man 
Na aankhon mein chamak 
                na munh pe raunaq 

                      Ye kaun hai ?
   jo aaj mere saamane 
                  aainay mein baitha hai ?

  Vo kahaan gaya?
        jo kuchh baras pahale 
                 mere aaeenay mein aata tha 
             hansata tha - muskuraata tha 

ab to badala badala sa 
                      sabhee kuchh ho gaya 
Vo na jaane kis jahaan  mein kho gaya ?

 dekhate hee dekhate 
                sab kuchh badal gaya 
    kuchh kho gaya -
                        kuchh mil gaya    
aaj bhee lekin puraanee - 
             kuchh khattee kuchh meethee 
                            yaadon se lipat ke rahata hoon            
aasapaas ke kolaahal se tang aakar 
                  apane aap mein simat ke rahata hoon 
duniya kee is bheed bhaad mein bhee aqsar
                                                --  akela rahata hoon
kabhee kabhee niraasha ka
              koee gahara baadal chha jaata hai 
       to udaas man ko 
                                   aur udaas kar jaata hai 
aankh barasane lagatee hai 
                                          jee ghabaraata hai 
bandha hua ho 
panchhee jaise koee pinjare mein 
anajaane - anadekhe 
            jhoothe bandhanon mein 
               bandha hua man chhatapataata hai 

Tabhi yakaayak aasha kee ik dhundhalee see -
             man ke gahare antastal ke 
   kisee kone mein chhupee huee -
                                   kiran koee laharaatee hai 
 aur in pheekee aankhon mein bhee 
                                   chamak see aa jaatee hai

khichadee jaise baalon mein 
                         kuchh rangat aane lagatee hai 
murajhae chehare pe bhee tab 
      dheere dheere 
               halkee halkee 
                       meethee see muskaan 
                                      naachane lagatee hai 

                        "Rajan Sachdeva"