Vo Humsafar Tha Magar

Vo humsafar tha magar us say hum-navaayi na thi 
ki dhoop chhaaon ka aalam rahaa - judaayi na thi 

Adaavaten thin, taghaaful tha, ranjishen thin magar
bichhadnay vaale me sab kuchh tha - be-wafaayi na thi 

Bichhadtay waqt un aankhon me thi hamaari ghazal
Ghazal bhi vo jo kisi ko kabhi sunaayi na thi 

Kabhi ye haal - ki dono me yakdili thi bahut 
Kabhi ye marhalaa jaise ki aashnaayi na thi 

Mohabbaton ka safar is tarah bhi guzraa tha 
Shiksta-dil thay musaafir, shikast-paayi na thi 

Na apnaa ranj, na auron ka dukh, na tera malaal
Shabe-firaaq kabhi hum nay yoon ganwaayi na thi 

Kisay pukaar raha tha vo doobtaa huaa din 
sadaa to aayi thi lekin koi duhaayi na thi 

Ajeeb hoti hai raah-e-sukhan bhi dekh "Naseer"
Vahaan bhi aa gaye aakhir jahaan rasaayi na thi 

                                                   By:  "Naseer Turabi"


Humsafar                    Companion 
Hum-navaayi             Harmony, understanding, unison conversation 
Aalam                          Situation
Adaavaten                  Enmity, Animosity    
Taghaaful                   Indifference
Ranjishen                   Feelings of anger
Be-wafaayi                 infidelity 
Yak-dili                       Oneness of hearts
Marhalaa                   Moment
Aashnaayi                  Friendship, affectionate relationship
Shikasta-dil                Broken heart, disheartened 
Shikast-paayi            Defeated, 
Ranj                             Sorrow 
Malaal                        Sadness / anger
Shabe-firaaq             Night of separation
Sadaa                          Call
Duhaayi                     Cry for help
Raahe-sukahan         Ways of speech
Rasaayi                       Reach
           Rasaayi na thi   (was out of reach)