Hai Tamanna Manzil kee to (Roman Script)

Hai Tamanna Manzil kee to raasta dekha na kar

Ek Daaman thaam kar phir doosra dekha na kar

Koi bhi rehtaa nahin apnaa hamesha ke liye

Ik sivaaye Rubb ke, dooja Aasra dekha na kar

Dekhna khud ko zaroori hai Sanvarne ke liye

Par kare Maghroor jo, Vo Aaina dekha na kar

Bakhshaa hai garche Khuda ne dil tujhe Fitrat-Shnaas

Har kisi mai Hunar dekha kar, Buraa  dekha na kar

Har bashar kee zindagi mai hoti hain Majbooriyaan

Har kisi ko har samay shaq ki nigaah dekha na kar

Vo agar dekhen to dekhen, dushmani kee nazar se

Vaasta Rub ka ae dil,  Tu is taraah dekha na kar

Chaahta hai gar, naa teri  Khaamiyan dekhe koi

To doosron kee khamiyaan bhi khaamkhaah dekha na kar

Kya zaroorat hai ki ‘Rajan’ sub se hum kehte phiren

Is taraah dekha na kar,  tu us taraah dekha na kar

                                                   ‘Rajan Sachdeva’

                                                        January 2, 2015