Jab Aaftaab dhalnay lagay - When the sun starts to go down

Jab Aaftaab Zindgee ka 

dhalnay lagay 

Vaqt - jab haath say 

phisalnay lagay  

Umra bhar sajaayaa 

- sanvaaraa jisay 

us Tan-bhavan ki neemv 

jab hilnay lagay  

Har shai jab dhundhali see dikhnay lagay 

Daant girnay lagay - Baal paknay lagay 

Saanson ka kaarvaan bhi thaknay lagay  

Alfaaz  - 

jab Zubaan pay ladkhadaanay lagain

Paanv - Chaltay huye dagmagaanay lagain  

Haath - Uthtay huye kampkampaanay lagain

khoob-soorat jism jab 

honay lagay nidhaal 

Dil ki dhadkanay bhi jab 

honay lagain betaal 

Vaqt jab thamtaa huaa lagnay lagay   

Saans bhi ruk ruk kay jab chalnay lagay

Farq Such aur jhooth ka -

us vaqt samajh aaye - to kyaa

Apnay karmon par agar 

us vaqt pachhtaaye - to kya 

Ashq nadaamat kay aankh mein bhi bhar aaye 

- to Kya?

Kyonki -

ae meray ham dam  

us vaqt to der - 

Bahut der ho chuki hogi 

Zahaanat  - 

Sab saazo-saamaan kho chuki hogi 

Zindgee thak har kay tab so chuki hogi 

islaah kay saaray imkaan kho chuki hogi 

Bas - abhi kuchh vaqt hai 

Kuchh sochnay - samajhnay kaa 

Kuchh paanay kaa - kuchh bananay kaa 

Kuchh kehnay, sunanay, sehnay kaa

Kuchh karnay - ya na karnay kaa

Sabr-o-sidaq

aur chain aman say rehnay kaa 

Bas -  yahi to vaqt hai 'Rajan'  

Sirf yahee ik vaqt hai 

Khud apnay aap say milnay kaa 

aur Jaan kay Sach -

phir Sach ki raah pay chalnay ka 

                                     ' Rajan Sachdeva '

Aaftaab    =      Sun

Ashk       =  Tears

Nadaamat  =  Repentance 

Ham Dam  = Life-log friend or companion 

Zahaanat  = Intelligence 

Islaah = betterment, improvement, rectification 

Imkaan =  Possibility, chance, opportunity

(islaah kay saaray imakaan kho chuki hogi = utkarsh ke sab avsar kho chuki hogi)