Papa - on Father's Day

Papa - Puraani pent rafu kara kar pahantay jaatay hain 

Branded nice shirt denay pay aankhen dikhaatay hain

Tootay chashmay say hee akhbaar padhnay ka lutf uthaatay hain

Topaz kay blade say daadhi banaatay hain

Pitaa ji aaj bhee paisay bachaatay hain !!

Kapday ka puraana thailaa liye door mandi tak jaatay hain 

Bahut mol-bhaav kar kay phal-sabjee laatay hain 

Aataa nahin khareedtay, gehoon pisvaatay hain 

Pitaa ji aaj bhee paisay bachaatay hain !!

Station say ghar paidal hee aatay hain 

Rickshaw lenay say katraata hain 

Sehat ka havaala detay jaatay hain 

Badhtee mehangayi pay chintaa jataatay hain

Pitaa ji aaj bhee paisay bachaatay hain !!

Poori garmi pankhay mein bitaatay hain 

Sardiyaan aanay par rajaayi mein dubak jaatay hain 

AC - heater ko sehat ka dushman bataatay hain 

Light khuli chhodnay pay naaraaj ho jaatay hain 

Pitaa ji aaj bhee paisay bachaatay hain !!

Maa kay haath kay khaanay mein ramtay jaatay hain

Baahar khaanay mein aanaakaani machaatay hain 

Saaf-saphaayi ka havaala detay jaatay hain 

Mirch, masaalay aur tail say ghabraatay hain 

Pitaa ji aaj bhee paisay bachaatay hain !!

Guzray kal kay kissay sunaatay hain 

Kaisay ye sab jodaa - garv say bataatay hain 

Puraanay dinon kee yaad dilaatay hain 

Bachat kee ehamiyat samajhaatay hain

Hamaaree har maang aaj bhee fauran poori kartay jaatay hain

Pitaa ji aaj bhee paisay bachaatay hain !! 

               Pitaa ji hamaaray liye hee paisay bachaatay hain !!

                                                      (Writer Unknown)