Paida kar kuchh Apnay aap mai hunar

Jaise koee kaagaz kaa tukdaa adhjalaa
ya paid say pattaa koee girtaa huaa
Naachtaa phiray khudee say bekhabar 
Taiz havaa ke kandhay par udtaa huaa 

Lekin kuchh hee dair mein zameen par 
girata hai mittee mein thiraktaa huaa 
Socho, kab talak karegaa mauj koee 
Doosaron kay bal pe chehkataa huaa 

Paidaa karay jo apnay qalb mein hunar 
Sadaaqaton kee raah pay chaltaa huaa 
Rakhay na auron se tavakko koee 
Phir bhee sub ko aashnaa rakhtaa huaa 

Phoolon kee maanind mehktaa huaa
khushbuon kee tarah bikhartaa huaa 
Manzilon ka safar taiy kartaa rahay 
Dil mein apnay hauslaa rakhtaa huaa

Main bhee musaafir hoon aik muddat say 
Aaya inheen raahon se guzartaa huaa 
Dekhay hain in raahon pe raahee kayi 
Dekhaa sooraj chadhtaa aur dhaltaa huaa 

Raahe haq ka safar go' aasaan nahin 
Paa legaa manzil bashar chaltaa huaa 
Shauqe-manzil hai to ruknaa hai haraam
Hai mubaarak har qadam badhtaa huaa 

Soch na ki manzil kitnee door hai 
Badhtaa chal aagay qadam dhartaa huaa 
Raastaa vahee hai - manzil bhee vahee 
Vaqt bas rehtaa hai badaltaa huaa 

'Rajan' raahay -haq ka musaafir hai tu 
Rehtaa hai har vaqt kyon dartaa huaa 
Raftaa raftaa chaltaa reh ba-hauslaa
Anaa kee reh-guzar say par bachtaa huaa 
   
                  'Rajan sachdeva'

Adhjalaa -------     Half burnt
Qalb  -----              Self, Personality 
Sadaaqton .......    Truthfulness, Honesty 
Tavakko  ------      Expectations 
Aashnaa  -------    Affection, Friendship 
Raahay-Haq   ----- Path of truth 
Raftaa-Raftaa ----- Slowly, Gradually, Step by step
Anaa-----------        Pride, Ego      
Reh-guzar  ........... Path, Street