Thursday, September 1, 2016

Na Pehale sa voh Shauq hai (Roman Script)

Na Pehale sa voh Shauq hai, Na josh hai Kirdaar me
Zubaan me vo taaqat rahi na dam rahaa Ghuftaar me 

Na pehale si vo soch hai na Lutf hai izhaar me 
Na pehale sa jazbaa raha, na dil hai akhtiyaar me 

Badal gayi hain neeyaten - Khud-gharziaan hain pyaar me 
Seekhane ki chaah nahin, uljhe hain sab Taqraar me 

Baaton me oonchay phalsaphe par dam nahin iqraar me
Farq nahin dikhtaa  koi apanon me aur aghyaar me

Na maarfat ki lagan hai, na dil hai Inksaar me
Chaahte hain log bus tasveer apani akhbaar me 

lagataa hai vo such - jo likha ho ishtehaar me
Isiliye to jhoot bhi bik jaata hai bazaar me

Na zauq hai na shauq hai na dam hai kuchh israar me 
Be-vajah rehta hai dil har vaqt ishtekaar me 

Na sabar hai na shukar hai din raat hai afqaar me 
Maghroor hai har shakhs apane hunar ke iftekhaar me 

Masroof hai har koi dekho apane kaarobaar me
Kisko fursat hai ki dekhe - kisi dile afgaar me 

Uljhaa hai har aadami bus Ghame rozgaar me 
Kise fiqar ? kya ho raha hai aaj is sansaar me 

Kaun chaahta hai ulajhanaa kisi aazaar me
Maasoom phanste jaa rahe hain phanda-e- ayaar me 

Na pehale si salaahiyat hi ab rahi anfaar me
Kitani hain tabdeeliyaan ab rasmon me, atwaar me 

Gaate the naghme kabhi talb-e-visaale yaar me 
Shauq hai nukmaayashon ka aaj ke funkaar me 

Mehram nahin hai koi kisi ka aaj ke adwaar me
Kaun poochtaa hai doston ko haale zaar me

Jazbaa-e-dil gumshuda hai aql ke pindaar me 
Badal gayi rivaayaten M'aarfat ke kaarobaar me

Baat bus itani si hai gar keh doon ikhtesaar me
Ruhaaniyat bhi dhalti jaa rahi hai ab vyopaar me

Jo bhi kehanaa tha vo keh daala hai in ash'aar me 
Ab yahi duaa hai 'Rajan' dargaahe-Sarkaar me 

Nazar me hon nafaasten, zubaan ziqre yaar me 
Fitarat me hon sadaaqaten, yaqeen Parvardigaar me 


           Baqalam: 'Rajan Sachdeva'


Kirdaar                   Action
Guftaar                   Speech
Izhaar                     Communication / Presentation of thoughts
Jazbaa                    Zeal
Akhtiyaar              Control 
Khudgarziyaan    Selfishness
Taqraar                 Arguemnets
Iqraar                    promise
Aghyaar                Others, unknown
M'aarfat                Spirituality
Inqsaar                 Humility
ishtehaar              Publicity
Zauq                      Zeal
Israar                    Determination
Ishtekaar             Complaints  
Afqaar                  Worries    
Iftekhaar             Pride      
Masrrof                Busy
Afgaar                  Injured   
Aazaar                 Trouble   
Ayyar                   Cunning  
Salaahiyat           Qualities / virtues 
Anfaar                 Masses / People
Atwwar               Traditions , Mannersim
Meharam            Well-wisher, Sympathetic
Adwaar                Time / date
Haale zaar           In trouble
Jazba-e-dil           Feelings / emotions of the heart
Gumshudaa          Missing / lost
Pindaar                  Ego / Pride
Rivaayaten            Tradions   
Ikhtesaar               in Brief     
Nafaasten              Goodness
Fitarat                    Nature     
Sadaaqaten           Truthfulness 

Baqalam       Written by (From the pen of)  

1 comment:

  1. This is amazing
    I read it and it was a pleasure
    Thanks

    ReplyDelete

किसी की क़ब्र पर क़व्वालियों से कुछ नहीं होगा

न हों पैसे तो इस्तक़बालियों से कुछ नहीं होगा * किसी शायर का ख़ाली तालियों से कुछ नहीं होगा  निकल आई है उन के पेट से पथरी शुगर-कोटिड  जो कहते थ...