Taj Mahal - Taj teray liye ik mazahare-ulfat hee sahee

Recently, I posted two lines from a Nzam - written by Sahir Ludhianavi on Taj Mehal. 

Some readers have asked for the complete Nazm.

Here it is:

                          ~~~~~~~~~~~~~~~~~~~

                        Meri Mehboob! kaheen aur milaa kar mujh say

Taj teray liye ik mazahare-ulfat hee sahee 

Tum ko is vaadi-e-rangeen say aqeedat hee sahee 

                      Meri Mehboob! kaheen aur milaa kar mujh say

Bazm-e-Shaahi mein gareebon ka guzar kya maanee

Sabt jis raah pay hon satvat-e-shaahi kay nishaan

Us pay ulfat bhari roohon ka safar kya maanee

Meri mehboob pas-e-parda-e-tashaheer-e-vafa 

Tu nay Satvat kay nishaanon ko to dekha hota

Murda shaahon ke maqaabir say behalnay waali

Apnay taareeq makaanon ko to dekha hota 

Un ginat logon nay duniya mein mohabbat kee hai 

Kaun kehtaa hai ki saadiq na thay jazbay un kay 

Lekin un kay liye tashaheer ka saamaan nahin 

Kyunki vo log bhee apni hee tarah muflis thay

Ye imaaraat-o-maqaabir, ye faseelen, ye hisaar 

Mutalaq-ul-hukm shehanshaahon ki azmat kay sutoon 

Daaman-e-daihar pay us rang ki gulkaree hai 

jis men shaamil hai teray aur meray ajdaad ka khoon 

Meri Mehboob! unhen bhee to mohabbat hogee 

Jin ki sannaayi nay bakhshi hai isay shaql-e-jameel 

Un kay pyaaron kay maqaabir rahay benaam-o-numood 

Aaj tak un pay jalaayi na kisi nay qandeel 

Ye chamanzaar, ye Jamuna ka kinaara, ye mehal 

Ye munaqkash dar-o-deevaar, ye meharaab, ye Taaq

Ik Shehanshaah nay daulat ka sahaara lay kar 

Hum gareebon kee muhabbat ka udaaya hai mazaaq 

                        Meri Mehboob! kaheen aur milaa kar mujh say

                                             " Sahir Ludhiaanavi "

Mazahare-ulfat     = Place for courtship 

Aqeedat    == Devotion, Reverence

Bazm-e-shaahi  =  King's Court 

Sabt  =    inscription, inscribed, Engraved 

Satvat-e-shaahi -- Royal wealth and majesty 

Pas-e-parda-e-tashaheer-e-vafa  =  Behind the veil of this publicity of love

Satvat kay nishaan  = Signs of Royal wealth, Show of power & grandeur, 

Murda shaahon ke Maqaabir - Tombs of dead kings 

Taareeq       = Dark - without light

Saadiq    =   Pure, true 

Tashaheer    = Publicity, Advertisement

Muflis  =  Poor

Imaaraat-o-maqaabir  =  Buildings and tombs

Faseelen    =    Wall around the fort - Fence

Hissar    = Fort

Mutalaq-ul-hukm = unchonditional absolute power - supreme command

Azmat kay Sutoon  = Towers, columns, pillars of their greatness & eminence  

Daaman-e-daihar pay =  on the world's sheet, slate

Gulkaari  =        Flowery engravings 

Teray aur meray Ajdaad ka khoon  =   Blood of your & my ancessotors 

Sannaayi     =  Artistry, Craftsmanship

Shaql-e-jameel  = Beautiful shape (form, structure) 

Unkay Maqaabir rahay benaam-o-numood = their tombs remained unknown, nonexistent 

Qandeel  = Candle 

Munaqkash dar-o-deevaar =  Elegantly engraved doors & walls

Meharaab  =   Arch, Chamber 

Taaq      =    small shelf - Niche carved in the wall