Sehraa mein bikhri Rait ka ek Kan

Sehraa mein bikhri rait ka ek kan

jo umar bhar 

baarish ki ek boond kay liye tarstaa raha 

Dhoop mein taptaa raha 

Aasmaan ki taraf taktaa raha 

iss ummeed mein - ki kabhi to vaqt badlega 

ik roz to aasmaan say paani barsegaa 

Achaanak ek din - 

kaheen door say

kuchh bhoolay bhatkay baadal 

aakar uskay sar pay mandraanay lagay

us kay man ko harshaanay lagay

khushi say naach uthaa vo pyaasa rait ka qatraa 

man mein aashaa kay kuchh deep jag-magaanay lagay

Aankhen chamak utheen - 

honth geet gungunaanay lagay

Usay laga - ki dard-o-gam ke din ab door huye

Thandak paayegi ab barson say jalti huyi chhaati

usay laga - ki zindgi mein ab bahaar aayegi

pyaasi zindagi jalan say raahat paayegi

mehak uthegi fizaa phoolon ki khushbu say har taraf

usay lagaa - ki  zindgi chaman ho jaayegi

Magar ye kya hua?

Kyon hua ?

Kaisay hua ? 

Kya ye us ki kismat thee? 

ya qudrat ka khel tha ? 

ki baarish barasnay kay jab imkaan bananay lagay

Nau-bahaar kay kuchh yoon armaan jagnay lagay

Aankhon mein kuchh naye khwaab sajnay lagay

To hawaa kay ek jhonkay nay udaa kar usay - 

kaheen door - 

dhoop say taptay huye 

rait kay ek doosray teelay pay laa kar patak diya 

jahaan na baadal thay - 

na ummeedon kay phool 

bas thee vahaan siraf dhool hee dhool 

jahaan door door tak har taraf bikhray huye thay

dhoop mein jaltee huyi rait kay qatray hee qatray

Na aankhon mein sapnay - na thandak na raahat 

na dhadkan dilon mein - na nagmon ki chaahat 

seenaa tha jin ka patthar saa ho gaya

unhi sab kay beech kahin vo bhi kho gaya 

Armaan jo uthay thay - vo dil mein hee reh gaye 

jo sapnay sajaaye thay aankhon nay - 

sapnay hee reh gaye 

Aql kee vaadi mein zehan bhatktaa rahaa

aakhir aisa kyon huaa - 

ye sawaal baar baar khatkta rahaa 

kya ye meri kismat thee ? 

ya mehaj ik haadsaa ? 

ya thee meray pichhlay gunaahon kee ye sazaa ? 

ya ye uska shugal tha - maalik ki thi razaa ?

Sunaa hai aakhir to vahi hotaa hai 

jo bhi mukaddar me likhaa hota hai

kisi kay sochnay ya karnay say kya hota hai?

to - jo likhaa tha kismat mein meri - 

vo ho gaya 

ye samjhaa kay dil ko -

aakhir thak kay so gayaa 

Aur vo bechaara rait ka anjaan saa zarra

Rait kay sehraa mein kaheen dab kay kho gayaa 

                                         " Rajan Sachdeva "     

 

Sehraa            - Desert 

Rait                 - Sand

Fiza                -  Atmosphere, surroundings

Imkaan          - Possibility

Naubahaar  -   New Spring

qataray         -  small particles or drops

Mehaj            - Just, Simply 

Zarra            -  Small particle