Duaa - Ye Saal Nayaa Achhaa Rahay

                      Ye Saal Nayaa Achhaa Rahay 

Maazoor ho na gareeb ho 

Na koyi kisee ka raqeeb ho 

Har marz  ka  tabeeb ho 

Sukh chain sab ko naseeb ho 

Miten dooriyaan sab qareeb hon 

Na hon ghair - Sab habeeb hon 

Shaaeestaa hon -- adeeb hon 

Sab log khush-naseeb hon 

Ab kisi ko koyi gham na ho 

Ab aankh koyi bhee nam na ho 

koyi  dil  kisi  ka  na  today 

koyi saath kisi ka na chhoday 

Koi chaahay kisi bhi haal mein ho 

Larzish na us kee chaal mein ho 

Sabr-o-Sidaq khisaal mein ho 

Har baat Sur aur Taal mein ho 

Har lafz ho napaa tulaa

Na dil mein ho koyi gilaa 

Sab maangen har ik ka bhalaa 

Dil aasmaan saa ho khulaa 

Na dil ho koyi malaal mein

Na haath uthen swaal mein

Koyi na ho  zawaal mein 

Har shakhs ho khush haal mein 

Na hijar ho visaal mein

Har chehra ho jalaal mein 

Hai kisi kay jo khyaal mein 

Usay sab milay is Saal mein 

Ye Saal nayaa ab aisaa ho 

Ki jo bhi ho sab achhaa ho 

Na dangay hon na jhagdaa ho 

Har dil mein pyaar ka jazbaa ho

Lab pay bas yahi dua rahay 

Har Dil mein yahi sadaa rahay 

Sab pay hi Prabhu dayaa rahay 

Ye Saal Nayaa Achhaa Rahay 

Maalik ka aasraa rahay 

Aur dil mein hauslaa rahay 

Naa 'Rajan' faaslaa rahay 

Ye Saal Nayaa Achhaa Rahay 

Lab pay yahee dua rahay 

Ye Saal Nayaa Achhaa Rahay 

Sab par Prabhu dayaa rahay 

Ye Saal Nayaa Achhaa Rahay 

                  '  Rajan Sachdeva '

Maazoor       =     Helpless, Feeble, Vulnerable 

Raqeeb          =    Enemy

Tabeeb          =    Doctor, One who can cure, Therapist 

Habeeb         =     Friends, Well-wishers 

Shaaeestaa   =    Cultured, Courteous, Refined, Sophisticated

Adeeb            =    Wise, Intelligent, Civilized, Artistic

Larzish          =    Shivering, Trembling with fear 

Khisaal          =    Nature, Habit 

Malaal           =    Sorrow, Regret, Grief 

Sawaal          =     Asking, Begging  

Zawaal           =   Downfall, Decline

Hijar              =   Separation, 

Visaal            =   Union

Jalaal            =   Glory, Dignity