Kis nay hain ye rang bikheray - Kis nay ye tasveer banaayi?

Yesterday morning, when I opened the curtains - I saw this beautiful, astonishing scene from the window - 
 (See Pictures at the bottom)
                Then later these few lines came to my mind
                     ..........................................

Kis nay hain ye rang bikheray - 
Kis nay ye tasveer banaayi?
Kkaun musavvar - subah saveray        
Kya thee us kay man mein aayi?
                       Ye surkh aariz, sunehari shuaaen 
                       Ufuq pay ye kaisa shabaab aa raha hai 

Kaun hai jis kee aamad say -
Aasmaan huaa gulaabi gulaabi
Khushbu hai phaili baad-e-sabaa mein 
Fizaa bhee hai lagti sharaabi sharaabi 
                           ye haseen manzar, ye haseen nazaara
                           ye sach hai ya koyi khwaab aa rahaa hai 

Mashriq say uthnay lagi hain kirnen  
Parinday bhee sar uthaanay lagay hain 
Arsh pay laal peelee lakeeren 
Dekh kay chehchahaanay lagay hain 
                       Aao mil kay ham bhee karen khair-maqdam
                       Ki subah-e-nau lay kay aaftaab aa rahaa hai 

Har subah aatee hai nayi umang lay kar 
Ek nayi aashaa - ummeed sang lay kar 
Zaraa gaur say dekhnaa jab ho fursat
kya kya nazaaray dikhaati hai qudarat 
                Lay kay nayi umangen, nayi ummeeden 'Rajan 
                Lay kay naye imkaan naye asbaab aa rahaa hai
                        Suprabhaat keh kay - karen is kaa Svaagat 
                        Nayi subah lay kay aaftaab aa rahaa hai 
                                                   " Rajan Sachdeva "


Musavvar                        Painter
Aariz                                Face, Cheeks
Shuaen                            Rays
Uufuq                              Horizon
Baad-e-saba                   Morning breeze, Refreshing wind
Mashriq                          East
Arsh                                 Sky
Khair-maqdam              Welcome
Subahe-nau                     New morning
Imkaan                             Possibilities
Asbaab                             Reasons. Circumstances 
Suprabhaat                     Good Morning
Aaftaab                            Sun