Har taraph barf kee chaadar bichhee hai

Subah khidkee say jhaank kar dekhaa -
ki har taraph barf kee chaadar bichhi hai 
Saamnay gharon ki chhaten, darakht aur sadken 
                                              Sab par safedi chhaayi hai 
Pichhvaaday kee jheel bhee jam gayi hai 
Aaj koi murgaabi, koi battakh bhee nazar nahin aayi hai 

Sardiyon ka ye udaas saa mausam - 
khaamosh hain ghar, dareechay aur galiyaan 
                    Thithurtay jism bhee kam-zarf ho gaye hain 
Doston mein bhi ab vo garmi nahin hai
          Lagtaa hai rishtay bhee jam kar barf ho gaye hain 
Svabhaav mein talkhee - boli mein rookhaapan 
            Teekhay teekhay say sab kay haraf ho gaye hain 

Na jaanay zamaanay ko kya ho gayaa hai 
       Lagtaa hai koi bhee apnaa nahin hai 
Lagtay hain sab ajnabi say - begaanay 
    Ab milnaa vo pahlay saa milnaa nahin hai 

Milaa koi jhootha - koi saathi chhoota 

Koi dost roothaa - koi rishtaa toota

                          Ye kissay hi aaj har taraf ho gaye hain 

Achhaa hai na rakhen ummeed kisi say
Kahin aashaa niraashaa mein badal na jaye 
Koi jitnaa karay - utnaa hee shukar hai 
Kuchh aur paanay ko man machal na jaye 
                    Ye karo meri khaatir - ab kehnaa nahin hai 
Na shikvay shikaayat, na minnat khushaamad 
                    Jazbaat kee dhaara mein behnaa nahin hai 
jis jagah na ho izzat, qadar na ho koi 
                 us jagah pay bahut dair rehnaa nahin hai

Magar phir ye khyaal aata hai -
                      Ki ho saktaa hai kal dhoop nikal aaye 
                                                  aur ye barf pighal jaye 
Shaayad kal zamaanay ka rang dhang bhi badal jaye
Vo puraani tehjeeb - vo salaahiyat 
Vo sab say milnay milaanay ki neeyat 
Vo rishton mein qurbat - doston mein mohabbat 
Adab guftgoo mein - dilon mein muravvat 
Vo Lehajay mein narmi - har ik say rafaaqat 
Vo ragabat, vo ulfat, khuloos-o-sharaafat 
Doston -azeezon kay duhkh sukh mein shirkat 
Jawaanon kay dil mein buzurgon ki izzat 

             Ye bhooli bisree baaten agar laut aayen 
             Ye saleekay puraanay agar phir say aayen
                                          Shafqat ka sooraj agar nikal aaye
To us ki garmaahat say mumkin hai 'Rajan'  
              ki dilon mein jamee kudoorat ki barf pighal jaaye 
                                        "Rajan Sachdeva"



Tehjeeb -                        Mannerism, Politeness, civilization
Salaahiyat -                   Gentleness, Ability, competence
Muravvat -                    Affection, kind-heartedness
Rafaaqat -                      Friendship, companionship 

Lehja -                            Tone
Ragbat -                         Inclination, Interest
Khuloos -                       Sincerity, Truthfulness
Shirqat -                        Participation,   To join, partnership
Shafqat -                       Affection, kindness 
Kudoorat -                    Resentment, enmity, misunderstanding, meanness, ill-will