Ye Meraa hai ye Teraa hai

Jo tu kehtaa hai ae gaafil ye meraa hai ye teraa hai 

Ye jis ka hai usee ka hai - na teraa hai na meraa hai 

Tu avval soch to dil mein ki tu hai kaun aur kya hai 

Namaazi hai sharaabi hai - uchakkaa hai luteraa hai? 

Farishta hai - pari hai - dev hai - ya aadami - jinn hai 

Balaa hai - bhoot hai - yaamun mazooraa ya kameeraa hai 

Jab in cheezon say tu apni tayeen kuchh cheez thehraa lay 

To us kay baad phir kahiyo ye mera hai ye tera hai 

Ye cheezen to garaz kya hain tu apnaa hee nahin maalik 

Tujhay O' be-khabar naadaan - ye kis gafalat nay gheraa hai

Tu kachay soot ka dhaagaa abas bal paich khaata hai 

Ye sab veham-e-galat hai aur qusoor-e-feham tera hai 

Tu kya jaanay ki tujh ko kis nay kis charkhay mein kaata hai 

Tu kya jaanay ki tujh ko kis ateran mein acheraa hai

Tamaasha hai mazaa hai sair hai kya kya aha haaha 

Musavvir nay ajab kuchh rang qudarat ka bikhera hai 

Taraqqee mein tanazzul hai - tanazzul mein taraqqee hai

Andheray mein ujaala hai - ujaalay mein andheraa hai 

Tilismaat-e-haqeeqee hai ye kuchh samjhaa nahin jaata 

Yahi chaand aur yahi sooraj yahi shaam aur saveraa hai 

'Nazeer' Allaah Alla is jahaan mein dam ganeemat hai 

Kahaan ham aur kahaan phir tum koyi dam ka baseraa hai

                                       ||Nazeer Aqabarabadi || 

Mazoora   =    Helpless, opressed

Abas          =    Just, Only 

Veham-e-galat =  Misunderstanding

Qusoor-e-feham = Fault of your thinking

Musavvir   =   Painter 

Taraqqee   =   Promotion

Tanazzul    =  Demotion, Decline,  fall, degradation 

kameera     =  Unknown, Secret 

Tilismaat-   =  Mirage 

Haqeeqee     =  Reality

Dam             =  Moment, Momentarily