Lagata Hai Ab Dilon Mein Sadaaqat Nahin Rahee

Lagata hai ab dilon mein sadaaqat nahin rahee
Kirdaar mein kisee kay nafaasat nahin rahee

Bandagee karatay hain gharaz say ya khauf say
Be-gharaz aur be-khauf ibaadat nahin rahee

Har kisi say to mohabbat kar sakay na hum
Lekin kabhee kisee say adaavat nahin rahee

Buniyaad kachee ho gayi hai jab say gyaan kee
Pehlay see vo shradhaa ki imaarat nahin rahee

Mazahab bhee ek dhandhaa hee ban kay hai reh gaya
Duniya mein ab kaheen bhee sharaafat nahin rahee

Haq doosron kaa chheen kay hanstay hain dekho log
Jaisay kisee ke dil mein nadaamat nahin rahee

Vo bhee ab meri tarah sanjeedaa ho gaye
Bachon mein vo pehlay see sharaarat nahin rahee

Vo ishq mein pehlay saa josh ab nahin rahaa
Vo pehlay see husan mein nazaakat nahin rahee

Na dam sukhan-goyi mein hai na soch hai nayi
Vo shayari mein husnay - ibaarat nahin rahee

Na josh-e -javaani hai, na josh-e- junoon hai
Vo zauq-aafreen zahaanat nahin rahee

Aankhon mein vo khaloos-e-mohabbat nahin rahee
Chehron pay ab vo noor-o-vajaahat nahin rahee

Bus qaid ho kay reh gayee hai soch aajkal
Vishaal aasmaan see zahaanat nahin rahee

Ab samajh mein aa gayaa is daur ka chalan
'Rajan' ab kisee say shikaayat nahin rahee

                                'Rajan Sachdeva'
                     (September 14, 2018)

Sadaaqat                                         Truthfulness
Nafaasat                                          Goodness 
Adaavat                                           Animosity, Hostility, Enmity 

Nadaamat                                       Shame, Feeling of being ashamed or humiliation  
Sanjeeda                                          Serious 
Zauq-Aafareen Zahaanat            Open, Light heart nature, Jolly nature
Sukhan-goyee                                 Oratory, Eloquent Speaking style 
Husane- ibaarat                             Beauty of language and grammar 
Khaloose-mohabbat                      Purity of love
Nooro -Vajaahat                            Shine, glow on face 
Zahaanat                                         Thinking,  Thoughts