Guzray Ye Zindgaani - Teri Yaad Kartay Kartay

Guzray ye zindgaani - teri  yaad  kartay  kartay 
Har svaas mein ho sumiran tu-hi tu-hi kehtay kehtay 

Teri yaad say hee meray har din ki ibtidaa ho 
Har shaam meri guzray tera dhyaan dhartay dhartay 

Teri yaad jo bhulaa day - vo khushi mujhay na denaa 
Khushiyaan bhi hon mubaaraq shukaraana kartay kartay

Karnaa reham ki guzray har lamhaa zindagi kaa
Sabaro-shukar say dil ko aabaad kartay kartay 

Vo bhi gaye jahaan say do gaz kafan mein lipatay 
Jo rahay tijoriyaan hee saari umar bhartay bhartay 

Be-khauf ho kay jeenay mein mazaa hai zindagi kaa
Kya kiyaa agarchay jeeye be-vajah hee dartay dartay

'Rajan' kee iltijaa hai ae meray saahib-e-jaanaa 
Rahay teraa hee tasavvur meray dil mein martay martay

                        "Rajan Sachdeva"
                       Written in Jammu in 1978

Tarz (Tune):  Katatay hain dukh me ye din pehalu badal badal kay 

Ibtidaa    ----------  Beginning
Tijoriyaan  -------  Safe box
Be-khauf  ---------  Fearless, without any fear
Iltijaa  ------------  Request, Appeal  
Tasavvur --------  Thought