Sukh kya hai, ik Parchhaayi hai

Sukh kya hai, ik parchhaayi hai
ye haath kisee ke na aayi hai
Mutthee me rait bharee jaise,
kholen to khaali paayi hai
Sukh kya hai, ik parchhaayi hai

Kya ho jaana dhan-vaan hai sukh ?
Rishtay naatay santaan hai sukh ?
ya mahal makaan dukaan hai sukh ?
kya sukh ke ye saamaan hai sukh ?
phir inako paakar kay bhee kyon ?
oopar tak jaakar ke bhee kyon ?
lagata hai kuchh nahin paaya hai 
Aslee sukh abhee bakaaya hai 
ik jhalak nazar to aayi hai 
par haath me kuchh na aaya hai 
jab say hee hosh sambhaala hai
ik lambee daud lagaayi hai
is sukh ko paane kee khaatir
Raaton kee neend gavaayi hai
Sukh kya hai ik parchhaayi hai

Hai aas us kee jo paas nahin 
jo paas us ka ehsaas nahin
jab tak ruktay ye svaas nahin
bujhne vaalee ye pyaas nahin
trishna ne bahut daudaaya hai
tarsaaya hai tadpaaya hai
kuchh paane kee is havas mein to
jo paas hai vo bhee ganvaaya hai
aankhon me nashtar kee bhaanti
kyon chubhta hai doojay ka sukh
kyoon dekh ke us kee khush-haali 
Sukh apna ban jaata hai dukh 
ye tulna chaltee aayi hai
chaahay shatru hai chaahay bhayi hai
saanjhe daaree hai nahin  is mein  
har insaan ek ikaayi hai
Sukh kya hai, ik parchhaayi hai

kya sukh itana kshan-bhangur hai
jaise koyi sheeshay ka ghar hai
dukh ka ik kankar seh na sakay 
itana kamajor hai - jarzar hai
Sukh pal bhar hee kyon aata hai ?
ye saath mein dukh kyon laata hai ?
pahale thay dukhee, ye aa jaaye 
aur ab hain dukhee, ye na jaaye
chaahay jatan anekon kar le koyi 
jhonkay kab havaa ke ruk paaye
jab jab bhee lena chaaha sukh 
ye ham say aankh churaata raha 
jab jab bhee dena chaaha sukh
ye sahaj hee paas me aata raha 
ye vo daulat hai, jo jitnee baanti, 
utanee hee paayee hai
Sukh kaya hai, ik parchhaayi hai

Maaya say toltay rahtay hain 
sukh mahanga hai na sastaa hai
ham baahar khojte rahtay hain
aur ye bheetar hee basta hai
na daulat se na taaqat se
na zor zabar se milta hai
ye vo kamal hai jo jal mein 
santosh sabar ke khilta hai 
satguru ne samjhaaya 'dilvar'
to baat samajh ye aayi hai
aasakti dukh ka kaaran hai 
aur Raam naam sukhdaayee hai
gar sukh ko ham chaahen sadaa
to sharan Raam kee lay leven
in kay charnon me ham apnaa
tan man dhan arpan kar deven
bhakti hee sukh kee kunjee hai
bhakti ka sukh hee sthaayi hai 
ye us ke hissay aaya hai 
jo Rabb ka bana shaudaee hai
Sukh kshanik nahin sukh sthaayi hai
Sukh Rabb kee hee parchhaayi hai
Sukh kshanik nahin sukh sthaayi hai
Sukh Rabb kee hee parchhaayi hai
                  By: " Dilvar Ji - Mumbai "