Hayaat - Sirf Behare Haadsaat hi to hai

Ye Hayaat Faqat behar-e-Haadsaat hi to hai 

Aur Maut  Gham-e Zeest se Nijaat hi to hai 

Behtay hain aankh se agar aansu to behnay day

Baadal say ho ya aankh say barsaat hee to hai 

Maayus hai kyon ae dil-e-be-sabar is qadar

Aakhir guzar hee jaayegi ye raat hi to hai 

Jaisee guzar rahi hai zindagi guzaar lo 

Socho zaraa ye chaar din ki baat hi to hai 

Na dekh kisi ghareeb ko nafarat ki aankh say
Vo bhi to aakhir aadmi ki zaat hi to hai

Vo hai agar ghareeb to uska hai kya qasoor
Vo zair-e-baar-e-gardish-e-halaat hi to hai 

Qudrat nay bakhshi hai agar 'Rajan' ye zindagi

To maut bhi qudrat kee ik saugaat hee to hai 

                                           'Rajan Sachdeva'

                                                      December 17, 2015  
                                       (On the death of an old acquaintance) 

Hayaat : Life 

Behare-Haadsaat : Flow of continuous Incidents, like a river
Gham-e Zeest: Pains and Sufferings of life
Nijaat : Release. to be relieved, Riddance, Freedom,
Maayus : Sad, Discouraged
Zair-e-baar-e-gardish-e-halaat : Downtrodden, suppressed by circumstances, under the weight of unfavorable circumstances
Qudrat : Nature
Saugaat : Gift