Raastay nahin hain dil lagaanay kay liye

Raastay nahin hain dil lagaanay kay liye 
Raastay hain manzilon ko paanay kay liye 

Vo to detee hai sabhee ko yaksaan raushnee
Jaltee nahin shamaa siraf parvaanay kay liye 

Kaagaz kee kashti banaa kay hum nay ek roz
Chhod dee dariyaa mein aazmaanay kay liye 

Afsos, ronay-dhonay mein hee cut gayi saari 
Zindgee thee hansnay aur hansaanay kay liye 

Zabaran lay aatay hain lub pay pheeki see muskaan 
Dard-e-dil ko auron say chhupaanay kay liye 

Na jaanay kitnaa vaqt abhee aur lagega 
Man kay uljhay dhaagon ko suljhaanay kay liye 

Baaten - jo khud bhee samajh na paaye aaj tak 
Kehtay rahay vo auron ko samjhaanay kay liye 

Baaten sachaai kee - dayaa aur dharm kee 
Reh gayi hain sunanay aur sunaanay kay liye 

Socho zaraa parindo ki patjhad agar na ho 
Tinkay kahaan milengay aashiyaanay kay liye 

Sukoot-e-rooh, shamm-e-daanayi, husn-e-mauseeqi 
Kuchh to karo  mehfilen sajaanay kay liye 

Kitnay saamaan hum nay jamaa kar liye 'Rajan'
Ik dil-e-besabar ko behlaanay kay liye 
                                  ' Rajan Sachdeva ' 

Yaksaan                                   Same, Similar, Equal
Zabaran                                   Forcefully
Sukoot-e-Rooh                          Silencing of Mind, Quietness, Peace
Shamm-e-Daanayi                Candle of wisdom, intelligence, enlightenment
Husn-e-Mauseeqi                  Beauty of Music