Gyaan ka deepak uthaa kay haath mein

Tu hee udgam hai meri har soch ka 

Har pal magar main sochtaa kuchh aur hoon 

Tum say hi to raushan hain aankhen meri 

Aankhon say par dekhtaa kuchh aur hoon 

Tum nay dee thee such-goyi kay vaastay 

Par zubaan say boltaa kuchh aur hoon 

Srishti kay kan kan mein tera vaas hai 

Phir bhee tujh ko dekh nahin paata hoon main 

Har naad mein chhupa Anaahat naad hai 

Lekin usko sun nahin paata hoon main 

Tu chhupa hai mere hee andar magar 

Tujh ko baahar dhoondtaa rehtaa hoon main 

Kis tarah barsegi inaayat Teri 

Logon say ye poochhtaa rehtaa hoon main 

Satya ka sooraj ujaagar hai magar 

Phir bhee andheray ka khauf rehtaa hai 

Saamnay hee hai meri manzil magar 

Phir bhee bhatknay ka khauf rehtaa hai 

Gyaan ka deepak uthaa kay haath mein 

Raushni logon say maangtay hain ham 

Maaloom hai ye duniya faani hai 'Rajan'

Phir bhi sukh duniya kay mangtay hain ham

                        ' Rajan Sachdev '

Udgam        =        Source

Such-Goyi   =       Speaking truth

Naad           =        Sound

Anaahat naad =  Anhad naad