Ik Ghazal Kabhi Uthati hai (Roman script)

Ik ghazal kabhi uthati hai mere seenay say

Kehane ko alfaaz magar miltay hi nahin

Mil jaayen to lub pe atak jaatay hain 

Likhoon - to kaagaz pe thehartay hi nahin

Sochoon - to har aqs har khayaal tera 

Naqsh ban kay mere dil me utar aata hai 

Chaahoon - ki rakh loon chhupaa ke seenay me 

to khushbuon ki taraha bikhar jaata hai 

Likh ke tera naam saaday kaagaz par 

Aqsar usko yoon ji chhod deta hoon

Samajh me jab aur kuchh aata nahin 

To sajday me haathon ko jod letaa hoon 

Ehsaas tujh se mil ke bichhad jaane ka 

Dard ban  seenay me kaskassata hai 

Dekhoon lekin dil ki aankhon say agar

Har taraf bus Tu hi nazar aata hai 

Roop Tera tab sajaa ke aankhon me 

Dheeray say palkon ko moond letaa hoon

Chun ke 'Rajan' phool teri yaadon kay

Saanson ki maalaa me goondh leta hoon 

                        'Rajan Sachdeva' 

                                                 (August 27, 2015)